Патăрьел районĕнчи Сăкăт шкулĕнче чăваш чĕлхипе литературине вĕрентекенсен уçă уроксен фестивалĕ Чăваш автономи облаçне туса хунăранпа 100 çул çитнине тата Астăвăмпа Мухтав çулталăкне халалланă. Фестивале Патăрьел, Елчĕк, Комсомольски районĕсенчи вĕрентекенсем хутшăнчĕç. Вĕрентекенсем чăваш чĕлхипе литературине вĕрентес, класс тулашĕнчи ĕçсене йĕркелесе ирттерес методикăна аван пĕлни палăрчĕ. Фестивальте тăван чĕлхепе литературăна вĕрентекенсем çĕнĕ стандартпа, вĕренÿре традициллĕ ĕç мелĕсемпе, çĕнĕ технологи элеменчĕсемпе, информаци хутшăну хатĕрĕсемпе компьютер техникипе анлă усă курчĕç. 5 чăваш чĕлхипе литератури урокĕ, 10 класс тулашĕнчи урок, 9 мастер-класс урокĕ, 1 квест-урок иртрĕ. Асăннă шкулта фестиваль-конкурс секцийĕсем питĕ пултаруллă ĕçлерĕç. Кашни урок, класс тулашĕнчи ĕç, мастер-класс занятийĕ питĕ çÿллĕ шайра иртрĕ. Мастер-класс урокĕсенче вĕрентекенсем хăйсен ĕç опычĕпе те, çĕнĕ технологи мелĕсемпе те тĕплĕн паллаштарчĕç.

Фестивале хутшăнма кăмăл тунă вĕрентекенсем нумайăшĕ çĕнтерÿçĕ ята тивĕçрĕç. Çитес çул чăваш чĕлхипе литература фестивалĕ Елчĕк тăрăхĕнче пулассине палăртса хăварчĕç.