Раштавăн 16-мěшěнче «Хыпар» Издательство çуртěнче «Тантăш» хаçатăн юнкорěсем ял хуçалăх министрěпе Сергей Артамоновпа тěл пулчěç.  Унта 19 çамрăк корреспондент килнěччě. «Хыпар» Издательство çурчĕн директорĕ-тĕп редакторĕ Татьяна Вашуркина пĕлтернĕ тăрăх, ял хуçалăх министрĕпе тĕл пулăва «Тантăш» хаçатăн чи хастар тусĕсем килнĕ.  Вěсен йышăнче  Нěркеç вăтам шкулěнче вěренекен Елизавета Быковăпа Арсений Плеткин та пулчěç. Сергей Геннадьевич пресс-конференци умĕн кашнинех алă тытса сывлăх сунчĕ, ачасемпе курнăçни хăйĕншĕн пысăк чыс пулнине палăртрĕ. 

  «Тантăш» хаçатăн ěçченěсем ачасене кăмăллăн кěтсе илчěç.  Юнкорсен ыйтăвěсем кăсăклă та интереслě пулчěç. Хаçат тусěсем Сергей Геннадьевича унăн ачалăхě, ěçě-хěлě пирки чылай ыйту пачěç. Сумлă хăна вěсене туллин хуравларě, шӱтлесе те илчě.

Мероприяти вěçěнче Сергей Геннадьевич юнкорсене çывхарса килекен Ҫěнě çулпа саламларě, пылак парнесемпе савăнтарчě. Пурне те тăрăшса вěренме  тата хаçатпа малалла та туслă çыхăнура пулма сунчě.

Тěл пулу хаваслă та асра юлмалла иртрě. Юнкорсем республикăри паллă çынсемпе тěл пулма яланах хавас. Ҫакă вěсен тавракурăмне аталантараать, пěлěвне ӱстерет.